Mi mancava na puisia didicata a Sant’Aituzza,
picchì u veru Catanisi non sa scodda a so Pattruna.
Ca na vota l’annu n’arriala a so facciuzza
E quannu passa ognunu rici: a visti ppì ffuttuna!
Tutta parata ri gioielli e di ricchizzi,
brillanti tempestunu stu bustu cu sti razza;
ca l’Amuri e a divuzioni ni ravvivunu i biddizzi.
St’oru non avi pruvinienza, manu nobili e puvurazza…
…ana inchiutu i casciola ri stà Santa,
e macari re e regini furasteri.
Eppuru non di tutti, Aita si nnì vanta,
ccì su chiddi trarituri cà ppoi azziccunu d’arreri.
Ma idda iè granni e piddona a tutti.
Taliatila cchè finicchia supra a so Varuzza,
ammirata e vinirata da longhi e cutti;
Ppi autru era figghia troppu bidduzza.
A so cuppa fù sulu, d’amari nostru Signuri,
inveci ca n’tintu omu vigliaccu e priputenti.
Chistu, risgraziatu, ccì nnì fici viriri culuri.
A fici matturiari e dopu l’ammazzau, non putennu nenti.
Ma idda era Santa, da testa n’sina i peri,
e comu tutti i Santi, da motti non si scantau.
Finu all’uttimu, davanti u so carneri,
china d’amuri e firi si prisintau.
U Signuri sa pigghiau n’gran triunfu,
ca macari oggi, dopu cintinaia d’anni
e sti tempi, ca sanu sempri cchiù di tanfu,
tutti s’arrioddunu, fistiggiannu a tutti i banni.
Festi ra ‘ccussì non ccì nné nta tuttu u munnu;
n’ciumi di cristiani ccì tirunu u curduni,
mentri i cannalori furriunu tunnu tunnu,
e u populu è munciutu ammenza lu stratuni.
Ppi pigghiari i cannalori di tutti li misteri,
ccì su i cchiù rossi e i cchiù devoti a sant’Aitedda.
Però u sfozzu cchiù ranni u fanu i pannitteri,
ca s’ana ‘mpuniri stù pisu, supra la vattedda.
È ‘nutili, cchiù parru e cch’assai ccì nné di riri,
ppi spiegari li virtù ri sta Santa cussì amata.
Pozzu sulu cunsigghiari a lu straneru di viniri,
a viririsi la festa e li biddizzi, di stà terra matturiata.
email: matteo_venuto@yahoo.it